Dito sa Lebak

DITO SA LEBAK

by Simon Go Fresco III

Nakatunganga,
Nakatulala,
Nangangalumata,
May tamang hinala.

Nagmumuni-muni,
Wala naman sa sarili,
Tumatawa, tumitili,
Iiyak pa nang kaunti.

Nasa sulok,
Nagmumukmok,
Baril nakasuksok,
Maya-maya’y mag-aamok.

Nasirang bait,
Pagkatao ang kapalit,
Saka pumipilipit
Alipin ng lupit.

Hindi makatulog,
Walang antok,
Pagkat lugmok
Napakarupok.

Ginawang sandata
Ang bisyo at droga,
Walang pagsala
Buhay nasira.

Kawawa…
Nagpakasira…
Hindi pinagana…
Ang puso at diwa!

Dito sa Lebak?
Lahat ay wala.
Walang bisyo,walang droga,
Walang pagsala,walang buhay na nasisira.